Dr. Aniceto Guro Berteni Neves, L.CG., MAPS – Membru Konsellu Administrasaun Centro Nacional Chega!I.P
Dr. Aniceto Guro Berteni Neves L.CG, MAPS. moris iha Ainaro, loron 12 Agusto 1973. Dr. Aniceto remata estudu Lisensiatura (S1) área Siénsia Polítika iha Universidade Nacional Timor-Lorosa’e (UNTL). Hafoin remata kontinua Mestradu iha área Master of Arts in Peace Study (MAPS) iha Universitas Kristen Duta Wacana (UKDW) Yogyakarta, Indonesia. No kontinua tan nia estudu Doutoramentu (Ph.D.) iha Fakuldade Interdisiplinár iha Universitas Kristen Satya Wacana (UKSW) Salatiga, Indonesia.
Dr. Aniceto iha esperensia servisu nu’udar Dosente Seniór no Peskizadór Espesializa iha istória, lei, direitus umanus internasionál, transformasaun dame no konflitu. Dr. Aniceto agora iha programa lisensiatura no pós-graduasaun iha Departementu Dezenvolvimentu Komunitária, Fakuldade Siensia Sosiais, UNTL. Dr. Aniceto nu’udar Dosente ne’ebé hanorin materia istória iha Institutu Filozófia no Teolójiku (ISFIT).
Dr. Aniceto nu’udar membru husi Diretóriu Revizór iha Comite Orientador-25 (CO25), hodi prezerva istória luta ba ukun rasik-an Timor-Leste nian. Iha tinan 2017, Dr. Aniceto hetan prestizu hodi simu prémiu ida husi Prezidente Repúblika Timor-Leste. Iha tinan 2019, Dr. Aniceto hetan fiar nu’udar Konsultór Profisionál ba Gender Social Inclusion (GSI) and Social Behavioral Change (SB) for the Millennium Challenges Corporation’s international cooperation program entre Estadus Unidus no Timor-Leste.
Ho koñesimentu akademiku no esperensia servisu ne’ebé iha, Dr. Aniceto iha obra oin-oin, nu’udar eskritór livru kona-ba Francisco Xavier do Amaral nu’udar Primeiru Prezidente Repúblika Demokrátika Timor-Leste. Iha livru ne’e, esplika Francisco Xavier do Amaral nu’udar figura importante ida iha Timor-Leste ne’ebé kulmina iha biografia no públika ona. Dr. Aniceto nu’udar eskritór kona-ba Manual Métodu Peskiza Istóriku Komunidade nian. Agora dadaun Dr. Aniceto Guro Berteni Neves L.CG., MAPS hetan fiar husi Governu nu’udar Membru Konsellu Administrasaun Centro Nacional Chega!I.P.